Åtte desiliter mjølk dagleg?

Det blir svært tydeleg at store delar av befolkninga har fått i seg for lite jod i lange tider. Legane treng eit midlertidig alternativ til å pushe mjølk.

Publisert

Denne artikkelen er mer enn fem år gammel.

Øygunn Leite Kallevik

Innlegg: Øygunn Leite Kallevik, sjukepleiar og skribent i Bergen

DET ER illustrerande at det er legen Tanja Kalchenko som oppmodar til plantebasert kosthald og ernæringsfysiologane Thea Myklebust-Hansen og Mona Bjelland som svarer på kronikken min i Dagens Medisin: «Vi treng legar som veit nok om jod».

Det kan grense til komisk når dette var eit av poenga eg prøvde å få fram. Nemleg at det er desse grupperingane som har kunnskap om, og som uttaler seg om jodsaka. Eg hadde eit lite håp om røyke ut eit par endokrinologar som kunne tilbakevise mine påstandar.

MULITIVITAMIN. Eg gjorde meg ferdig med å kritisere Helsedirektoratet i «Det gløymde stoffet» på nrk.no i februar. No har eg vendt meg til legar, som kanskje er meir fokusert på sjukdom enn på ernæring. Styresmaktene jobbar med å tilsetje jod i salt/matvarer. Inntil vidare bør vi jobbe med å redusere skadeverknadane av deira seine respons på WHO sine tilrådingar.

Kvinner med fertilitetsproblem og som spontanaborterer, besøkjer nok ofte ein lege. Det ligg ei potensiell gullgruve i jod sidan mange kan ha jodmangel og tilhøyrande plager utan å vite det. Mjølk eller ikkje mjølk. Her i slekta blir det multivitamin til jul.

OPPDATERT. Eg er nøgd med at Helsedirektoratet no har oppdatert sine retningsliner med tilråding om jodtilskot for barselomsorg og publikum. Mengde mjølk som skal til for å få eit godt jodnivå har vore ein godt skjult løyndom i årevis.

Her er eit utdrag frå retningslinene om jod: «Gravide bør anbefales et daglig kosttilskudd med 150 μg jod/dag dersom de»:

• har et lavere daglig inntak enn 6 dl melk/yoghurt, eller

• spiser lite/ingen hvit saltvannsfisk og samtidig får i seg mindre enn 8 dl melk/yoghurt per dag.

Seks til åtte desiliter mjølk er mykje. Det blir svært tydeleg at store delar av befolkninga har fått i seg for lite jod i lange tider. Legane treng eit midlertidig alternativ til å pushe mjølk. Dette har Helsedirektoratet innsett. Det er bra.

ULEMPA MED JODTILSKOT. Når folket knaskar multivitamin, blir det kanskje enda meir komplisert å vite kor mykje ein skal berike maten/saltet. Eg klarer likevel ikkje å sjå at vi har noko val, men dette må vere midlertidig til vi får nok jod via den maten vi faktisk et. Mitt forslag er å snarast gjere massemåling av jod i døgnurin for å skaffe oversikt på problemet. Ei måling før og etter beriking.

Det seier seg sjølv at det er mange som lever farleg med tanke på manglande jodinntak. Ein av grunnane til at Helsedirektoratet ikkje har følgd råda frå WHO om å tilsetje nok jod i saltet, handlar kanskje nettopp om at mjølkemafien har vore for sterk. Det er ikkje alle som toler mjølk, spesielt dei frå fjerne strøk. Dei har ikkje blitt tatt omsyn til. Dei har blitt avfeia med informasjon om betydning av mjølk.

Den kjensgjerninga at Helsedirektoratet skriv svart på kvitt at store deler av fertile kvinner treng tilskot, er interessant i seg sjølv. No manglar det berre retningsliner til resten av folket som risikerer å pådra seg stoffskiftesjukdom.

Oppgitte interessekonfliktar: Artikkelforfattaren er også skribent for bloggstaden altomlitt.no

Powered by Labrador CMS